«Ադրբեջանին զենք մատակարարելու հարցում էմբարգո չկա». ռուս փորձագետ
Ռուսաստանի Գիտությունների ակադեմիայի Արևելագիտության ինստիտուտի Կենտրոնական Ասիայի և Կովկասի ուսումնասիրության կենտրոնի գիտական աշխատող Անդրեյ Արեշևից այսօր լրագրողները հետաքրքրվեցին, թե ինչպե՞ս է լինում, որ ԵՏՄ անդամ երկրները զենք են վաճառում նույն միության անդամ Հայաստանի հակառակորդ Ադրբեջանին։
Ի պատասխան՝ Արեշևն ասաց, որ այդ հարցին տարբեր ձևերով կարելի է մոտենալ. «Ադրբեջանին զենք մատակարարելու հարցում էմբարգո չկա։ ԵՏՄ անդամ երկրները կարող են ռազմատեխնիկական համագործակցություն ունենալ ցանկացած երկրի հետ։ Ցանկացած միությունում կողմերի հետաքրքրությունները չեն կարող ամբողջովին համընկնել։ Դա մենք տեսնում ենք ԵՏՄ-ում, նաև եվրոպական կազմակերպություններում։ Բավարար է նշել, թե ինչպիսի հարաբերություններ ունեն ՆԱՏՕ-ի անդամ Թուրքիան և Հունաստանը»։
Նրա խոսքով՝ Բելառուսի և Ղազախստանի հարաբերությունները Հայաստանի հետ ոչ միշտ են այսքան սառը եղել. «2000-ականներին, որքան ես եմ հիշում, Հայաստանի և Բելառուսի հարաբերությունները բավականին ջերմ էին, հետո իրավիճակը որոշակիորեն փոխվեց։ Ես կարծում եմ, որ այստեղ խոսքը պետք է նաև հայկական դիվանագիտության ավելի ակտիվ աշխատանքի մասին լինի»։
