Իրանը և Թուրքիան չպետք է թույլ տան Իրաքյան Քրդստանի անկախությունը. այաթոլլա Խամենեի
Իրանը եւ Թուրքիան պետք է ձեռնարկեն անհրաժեշտ բոլոր միջոցները, որպեսզի թույլ չտան Իրաքի քրդական ինքնավարության անջատումը այնտեղ կայացած հանրաքվեից հետո: Այդ մասին, ինչպես հայտնել է Al Sumaria հեռուստաալիքը, հայտարարել է Իրանի Իսլամական Հանրապետության ղեկավար եւ հոգեւոր առաջնորդ այաթոլլա Ալի Խամենեին Թուրքիայի նախագահ Ռեջեփ Թայիփ Էրդողանի հետ Թեհրանում կայացած հանդիպմանը։
Խամենեիի համոզմամբ՝ Իրաքյան Քրդստանում անցկացված հանրահարցումը ծառայել է «Վաշինգտոնի եւ Թել Ավիվի շահերին, որոնք ձգտում են նոր Իսրայել ստեղծել տարածաշրջանում»:
«Իրանը եւ Թուրքիան պետք է ձեռնարկեն անհրաժեշտ բոլոր միջոցները՝ դիմակայելու դրան»,- ասել է նա:
Թուրքիայի նախագահը հոկտեմբերի 4-ին բանակցություններ է վարել նաեւ Իրանի նախագահ Հասան Ռոուհանիի հետ: Ռոուհանին, մասնավորապես, հայտարարել Է, որ Իրանը եւ Թուրքիան թույլ չեն տա խախտել Իրաքի եւ Սիրիայի տարածքային ամբողջականությունը:
«Մենք հաստատում ենք Սիրիայի եւ Իրաքի տարածքային միասնությունը, մենք թույլ չենք տա վերաձեւել տարածաշրջանը»,-նշել է Ռոուհանին: Նա նաեւ ընդգծել է, որ «Իրանը եւ Թուրքիան ամեն կերպ կդիմակայեն ապաինտեգրացմանը Իրաքում եւ Սիրիայում», հաղորդել է ՏԱՍՍ-ը:
