«Ավագ որդիս անգամ պատրաստվում է ԱԺ-ին նամակ գրել․բոլորիդ է այդ ճակատագիրը սպասվում». Արմեն Աշոտյան
«Պարոն Փաշինյան, ձեր կայքում գրված է, որ Արմեն Աշոտյանը Գագիկ Ծառուկյանից հետո ամենից շատն է բացակայել նիստերից։ Գրված է, որ ես անպարտաճանաչ եմ։ Ես, իրոք, բացակայել եմ նիստերից, որովհետև սեպտեմբերին 30 օրերից 20-ը ես գործուղումների եմ եղել։ Այդպես եք աշխատում թվերի հետ։ Թվերի հետ աշխատանքն ավելի շատ կուլտուրա է պահանջում»,- այսօր ԱԺ-ում այս մասին ասաց ՀՀԿ խմբակցության պատգամավոր Արմեն Աշոտյանը։
«Փաստորեն, մենք վայելում ենք Արմեն Աշոտյանի կարճաժամկետ աշխատանքային այցը ՀՀ, որովհետև ինքը միշտ կարևոր գործերով արտասահմանում է»,- արձագանքեց «Ելք» խմբակցության պատգամավոր Նիկոլ Փաշինյանը։
Արմեն Աշոտյանն էլ կոչ արեց զերծ մնալ քսենոֆոբիկ հայտարարություններից. «Պարոն Փաշինյան, ավագ որդիս անգամ պատրաստվում է ԱԺ-ին նամակ գրել, որ եթե հոկտեմբերին նույնքան բացակայեմ, որքան սեպտեմբերին, քննարկել իմ հարցը արդեն ընտանեկան խորհրդում։ Ինձ թվում է՝ բոլորիդ է այդ ճակատագիրը սպասվում պարբերաբար։ Ես կոչ կանեմ նման քննարկումների ժամանակ զերծ մնալ քսենոֆոբիկ հայտարարություններից։ Չի կարելի արհամարհանքով խոսել որևէ պետության մասին»։
