Տեղեկանք` 2017 թ. հունվար-սեպտեմբեր ամիսներին ՀՀ Զինված ուժերում և ԼՂ Պաշտպանության բանակում մահացության դեպքերի մասին. ՀՔԱՎ
Հելսինկյան Քաղաքացիական Ասամբլեայի Վանաձորի գրասենյակը ներկայացնում է վերջին 9 ամիսների ընթացքում ՀՀ զինված ուժերում և ԼՂՀ պաշտպանության բանակում արձանագրված մահացությունների վերաբերյալ տեղեկանք:
Տեղեկանքում ներկայացված են 2017 թ. հունվար-սեպտեմբեր ժամանակահատվածում զանգվածային լրատվամիջոցներով և պաշտոնական աղբյուրներով տարածված, ինչպես նաև մահացած զինծառայողների հարազատների կողմից տրամադրված տեղեկությունները: ՀՔԱ Վանաձորի գրասենյակի ուսումնասիրությունները ցույց են տվել, որ նշված ժամանակահատվածում արձանագրվել է մահացության 46 դեպք:
Նրանցից 29-ը ժամկետային զինծառայողներ են եղել: 44 դեպքի վերաբերյալ եղել է պաշտոնական հաղորդագրություն, 2 դեպքի մասին տեղեկություն է տարածվել միայն լրատվամիջոցներով:
Այս տարվա առաջին 9 ամիսներին արձանագրված մահացության դեպքերի գերակշիռ մասը՝ 29 դեպք, արձանագրվել է Լեռնային Ղարաբաղում:
Ըստ Զինվորական քննչական գլխավոր վարչության հրապարակումների՝ 38 մահացության դեպքով հարուցվել են քրեական գործեր: Նրանցից ժամկետային զինծառայող Վարդան Մելքոնյանի իրավահաջորդի իրավունքների պաշտպանությունն ստանձնել է ՀՔԱ Վանաձորի գրասենյակը: Հրադադարի ռեժիմի խախտման հետևանք են եղել արձանագրված դեպքերից 21-ը:
Նախորդ տարվա նույն ժամանակահատվածում արձանագրված 28 դեպքի համեմատ՝ 2017-ի առաջին 9 ամիսներին հրադադարի ռեժիմի խախտման հետևանքով մահացությունների թիվը նվազել է:
Սպանության, ինքնասպանության և դժբախտ պատահարների արդյունքում մահացության դեպքերի թիվը ևս նվազել է, փոխարենը զգալիորեն աճել է առողջական պատճառներով մահացությունների թիվը. նախորդ տարվա նույն ժամնակահատվածում արձանագրվել է 1 դեպք, իսկ 2017-ի սեպտեմբեր-հունվար ամիսներին՝ 4 դեպք:
Ընդհանուր առմամբ՝ 2016 թ.-ի համեմատ՝ 2017 թ.-ին հրադադարի ռեժիմի խախտման հետևանքով մահվան դեպքերը նվազել են 7-ով, դժբախտ պատահարների հետեւանքով մահվան դեպքերը նվազել են 9-ով, սպանության դեպքերը նվազել են կրկնակի անգամ, ինքնասպանության կամ ինքնասպանության հասցնելու պատճառով մահվան դեպքերը նվազել են 1-ով:
Վիճակագրական այլ տվյալներ և դեպքերի մանրամասն նկարագրությունները ներկայացված են տեղեկանքում:
Հելսինկյան Քաղաքացիական Ասամբլեայի Վանաձորի գրասենյակ
