ԱՄՆ-ը հրաժարվել է Սիրիայում ՌԴ-ի հետ համակարգել ցամաքային գործողությունները
Ռուսաստանն ԱՄՆ-ին առաջարկել է ստորագրել Սիրիայում ոչ միայն երկնքում, այլեւ ցամաքում գործողությունների համակարգման համաձայնագիր, բայց ամերիկյան կողմը չի ընդունել այդ առաջարկությունը: Այդ մասին սեպտեմբերի 29-ին հաղորդել է «Իզվեստիա» թերթը՝ վկայակոչելով Ռուսաստանի դիվանագիտական շրջանակների բարձրաստիճան աղբյուրների։
«Այդ պլանն, ըստ էության, կրկնում էր օդում միջադեպեր թույլ չտալու՝ արդեն գործող համաձայնագիրը, բայց ԱՄՆ-ը հրաժարվել է: Ինչպես էլ լինի, մեր միջեւ համակարգում կա, բայց այն չի կանոնակարգվում ոչ մի կարգի փաստաթղթով»,- ասել է հրատարակության զրուցակիցներից մեկը:
Նրա խոսքով՝ Վաշինգտոնի նման վարմունքի հնարավոր պատճառն այն է, որ համաձայնագրի առկայության դեպքում ամերիկացիները ռուսական կողմի պահանջով ստիպված կլինեին հայտնելու իրենց զորամասերի դիրքը Սիրիայի այս կամ այն շրջանում, բայց, ըստ երեւույթին, նրանք ցանկանում են դրանից խուսափել, հաղորդել է «Ինտերֆախս»-ը:
