Թիլերսոնը Չինաստանի իշխանությունների հետ կքննարկի հյուսիսկորեական խնդիրը
ԱՄՆ-ի պետքարտուղար Ռեքս Թիլերսոնը սեպտեմբերի 28-30-ը ուղեւորություն կկատարի Պեկին՝ ԱՄՆ-ի նախագահ Դոնալդ Թրամփի ՉԺՀ այցի նախապատրաստման շրջանակներում: Այդ մասին սեպտեմբերի 26-ին կայացած բրիֆինգում հայտնել է Պետդեպարտամենտի մամուլի ծառայության ղեկավար Հեզեր Նաուերթը:
«Այս ուղեւորությունը կկայանա նախագահ Դոնալդ Թրամփի՝ նոյեմբերին ՉԺՀ կատարելիք այցի նախապատրաստման շրջանակներում,- նշել է նա:
Պետքարտուղար Թիլերսոնը հանդիպումներ կանցկացնի Չինաստանի բարձրաստիճան ներկայացուցիչների հետ: Սա նրա՝ որպես պետքարտուղարի, արդեն երկրորդ այցն է Չինաստան: Այցի ընթացքում նա կքննարկի մի ամբողջ շարք հարցեր, այդ թվում՝ Կորեական թերակղզու միջուկազերծման խնդիրը, ինչպես նաեւ առեւտրի եւ ներդրումների հարցերը», հաղորդել է ՏԱՍՍ-ը:
