Մեխիկոյում գրեթե մեկ միլիոն մարդ առանց ջրի է մնում երկրաշարժից հետո
Մեքսիկայի մայրաքաղաքի արեւելքի Իստապալապայի շրջանի առնվազն 900 հազար բնակիչներ մինչ օրս ջրամատակարարումից օգտվելու հնարավորություն չունեն սեպտեմբերի 19-ին տեղի ունեցած ուժգին երկրաշարժից հետո: Սեպտեմբերի 26-ին այս մասին հայտնել է շրջանի վարչակազմը:
7,1 մագնիտուդով ստորգետնյա ցնցումը հանգեցրել է Իստապալապայի ջրմուղի ցանցերի ավելի քան 820 վնասվածքների, եւ դրանց մեծ մասը մինչ այժմ վերացված չէ:
Ինչպես Televisa հեռուստաալիքին հայտարարել է շրջանի ղեկավար Դիոնե Անգիանոն, իրադրությունը մնում է «տագնապալից»: Իստապալապայում բնակվում է շուրջ 2 միլիոն մարդ:
Ներկայում հայտնի է տարերքի հարվածի 333 զոհերի մասին, մի քանի հարյուր մարդ մնում է հիվանդանոցներում, հաղորդել է ՏԱՍՍ-ը:
