Վահան Մարտիրոսյանը հստակեցրեց՝ որքան գումար է ծախսվել «Հյուսիս-Հարավ» ծրագրի վրա
««Հյուսիս-Հարավ» ճանապարհային միջանցքի ներդրումային ծրագրի Աշտարակ-Թալին ճանապարհահատվածի ձախակողմյան հատվածում արդեն իսկ տեղադրվել է շուրջ 11 կիլոմետր բետոնե ծածկ, ևս 15 կիլոմետր նախատեսվում է տեղադրել մինչև տարեվերջ»,- այսօր լրագրողների հետ հանդիպման ժամանակ ասաց ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը:
Նրա խոսքով՝ հոկտեմբերի առաջին տասնօրյակում 7 կամուրջներից 3-ը կհանձնվեն շահագործման, իսկ մնացած 4-ի վրա կշարունակվեն որոշակի շինարարական աշխատանքներ: Նա նկատեց, որ կամուրջներին հարող հատվածների երկկողմանի երթևեկությունը վերականգնվել է մայիսին»:
Խոսելով Ասիական զարգացման բանկի հայաստանյան գրասենյակի տնօրեն Շեյն Ռոզենտալի հայտարարության մասին, որ չկառուցված՝ Աշտարակ-Լանջիկ հատվածի շինարարության արժեքը կհասնի 3,5 միլիոն դոլարի, Վ. Մարտիրոսյանը նշեց, որ Ասիական զարգացման բանկը ֆինանսավորում է «Հյուսիս-Հարավ» ավտոճանապարհի հատվածներից մի քանիսը, և նախարարությունն ու Ասիական զարգացման բանկը լավ համագործակցում են իրար հետ:
«Ցանկացած ծրագիր քննարկվում է և՛ նախարարությունում, և՛ բանկում: Նախարարությունը գնահատում է իր տեսանկյունից, բանկը՝ իր, քննարկում, համատեղ լուծումների ենք գալիս»,- նշեց նախարարը:
Լրագրողի հարցին՝ կառավարությունը ավարտին կհասցնի՞ ճանապարհի կառուցումը, Վ. Մարտիրոսյանը պատասխանեց, որ՝ այո, կհասցնեն: Նրա խոսքով՝ Հայաստանին պետք է այդ ճանապարհը. «Ունենում ենք հյուսիսը հարավին կապող բարձրակարգ ճանապարհ, ճանապարհի որակից կախված է և՛ տուրիստական հոսքը, և՛ բեռնափոխադրումների հոսքը, որը, վստահ ենք, կշատանա: Կակտիվանա նաև բիզնեսը: Ցանկացած ծրագիր նախևառաջ՝ պետք է ուսումնասիրվի, և գումարների օգտագործումն ուղղվի այնտեղ, որտեղ ավելի շատ եկամուտ կստանա»:
Վ. Մարտիրոսյանը վստահ է, որ ՀՀ-ն և ՀՀ քաղաքացին իր վրա կզգա այդ ներդրումը, և այս ճանապարհն այդ կարևոր ծրագրերից մեկն է. «Ճանապարհի Գյումրի-Բավրա հատվածի ֆինանսավորման հայտ դեռ չի ներկայացվել, քանի որ նախագծային մոտեցումները դեռ հստակեցված չեն, թե ինչ ճանապարհ է լինելու: Բայց այդ աշխատանքները կատարվում են, և մյուս տարվա սկզբին կներկայացվի նաև նախագիծը: Իսկ «Հյուսիս-Հարավ» ծրագրի հարավի հատվածում ամբողջական ծրագիրը վերջնական պատրաստ չէ: Կարող են փոփոխություններ լինել»:
Նախարարը նաև նշեց, որ մամուլում հայտնված այն լուրերը, որ կառուցվել է 30 կիլոմետր ճանապարհ և ծախսվել է 150 մլն դոլար, այդքան էլ իրականությանը չի համապատասխանում. «Կցանկանայի հստակեցնել. կա վճարված և կա ընդունված աշխատանք: Աշխատանքն ընդունվել է 30 կմ, որի համար վճարվել է 70 մլն-ի չափով, իսկ ընդհանուր վճարվել է 150 մլն, բայց կան աշխատանքներ, որ դեռ չեն ընդունվել, դեռ շարունակվում են աշխատանքներն այդ հատվածներում»:
Ի պատասխան հարցին էլ, թե՝ կարո՞ղ է ճանապարհի կառուցման համար ծախսվող գումարը գերազանցել 2 միլիարդ դոլարը, Վ. Մարտիրոսյանը չբացառեց, բայց հույս հայտնեց, որ մասնավոր ընկերությունների կողմից ներդրումային ծրագրեր կիրականացվեն ճանապարհի որոշ հատվածների կառուցման համար։
