Չինաստանում 10 տարեկան աղջնակն ընդունվել է ինստիտուտ
Չժան Իվեն անունով հրաշամանուկ աղջիկը տասը տարեկան հասակում ընդունվել է Չինաստանի Հենանի նահանգի Շանցյու քաղաքի Տեխնոլոգիական ինստիտուտ: Այդ մասին գրել է «Ժենմին ժիբաո» թերթը:
Աղջիկն ընդունելության քննություններին հավաքել է 353 միավոր եւ դարձել ինֆորմատիկայի ու էլեկտրոնային ինժեներիայի ֆակուլտետի ուսանողուհի, որտեղ նա սովորելու է առաջիկա երեք տարիներին:
Հրատարակության տվյալներով՝ աղջիկը երբեք չի հաճախել դպրոց, նրան տանը ուսուցանել են ծնողները: Նրա հայրը հուսով է, որ ապագայում իր դուստրը կստանա դոկտորի աստիճան:
Չժան Իվենն ինստիտուտ է ընդունվել երկրորդ փորձից: Նշվում է, որ անցյալ տարի նա ընդունելության քննություններին հավաքել էր միայն 172 միավոր եւ մրցույթով չէր անցել, հաղորդել է ՌԻԱ Նովոստին:
