Մադրիդը կոչ է արել Կատալոնիայի ղեկավարին՝ հանրաքվեի փոխարեն ընտրություններ կազմակերպել
Իսպանիայի իշխանությունները կոչ են արել Կատալոնիայի ղեկավար Կառլես Պուչդեմոնին՝ կազմակերպել ոչ թե անկախության հանրաքվե, այլ տարածաշրջանային նոր ընտրություններ եւ այդ կերպ իմանալ ինքնավարության բնակիչների տեսակետը: Այդ մասին հայտարարել է կրթության, մշակույթի եւ սպորտի նախարար, կառավարության պաշտոնական ներկայացուցիչ Ինյիգո Մենդես դե Վիգոն:
«Եթե Պուչդեմոնը ցանկանում է իմանալ կատալոնացիների տեսակետը, դա շատ հեշտ է՝ թող ինքնավարության ընտրություններ կազմակերպիե,- նշել է իսպանական իշխանությունների ներկայացուցիչը Antena-3 հեռուստաալիքին տված հարցազրույցում: Նա հավելել է, որ նոր ընտրություններ անցկացնելու որոշումը մարզի ղեկավարի իրավասության մեջ է այն դեպքում, երբ անկախության հանրաքվեի կազմակերպումը՝ ոչ: Կատալոնիայի խորհրդարանն ընդունել է օրենք անցումային շրջանի մասին, որն, անկախության կողմնակիցների կարծիքով՝ իրավական հիմք կստեղծի Իսպանիայի կազմից ինքնավար մարզի դուրս գալու համար:
Փաստաթուղթն ուժի մեջ կմտնի միայն հոկտեմբերի 1-ին նշանակված հանրաքվեում Կատալոնիայի անկախության կողմնակիցների հաղթանակի դեպքում: Օրենքը կգործի երկու ամսվա ընթացքում՝ մինչեւ ինքնուրույն խորհրդարանական հանրապետության ստեղծման գործընթացի կիրարկումը: Ավելի վաղ Կատալոնիայի խորհրդարանը (Ժեներալիտետ) ընդունել է օրենք հանրաքվեի մասին եւ կից փաստաթղթեր, մասնավորապես, ընտրական հանձնաժողով կազմելու եւ քվեարկության կազմակերպման սկզբունքների մասին:
Սեպտեմբերի 7-ին Իսպանիայի Սահմանադրական դատարանն արտահերթ նիստում կասեցրել է այդ բոլոր փաստաթղթերի գործողությունը: Իսպանիայի իշխանությունները նաեւ նախազգուշացրել են Կատալոնիայի զանգվածային լրատվամիջոցներին, ինքնավար մարզի պետական ծառայողներին եւ ոստիկանության ղեկավարությանը դատական վճիռների չկատարման հետեւանքների մասին:
Ի պատասխան Սահմանադրական դատարանի վճռի՝ ինքնավար մարզի կառավարության նախագահ Կառլես Պուչդեմոնը հայտարարել է, որ ,Կատալոնիայում ժողովրդավարությունը ոչ ոք չի կանգնեցնիե, հաղորդել է ՏԱՍՍ-ը:
