Սիսիան-Վայք ավտոճանապարհին մեքենան դուրս է եկել երթևեկելի հատվածից և սահել ձորը. կան վիրավորներ
Հունիսի 13-ին, ժամը 15:25-ին ՀՀ ԱԻՆ ահազանգ է ստացվել, որ Սյունիքի մարզի Գորայք գյուղի մոտակայքում տեղի է ունեցել ՃՏՊ, «Mercedes» մակնիշի ավտոմեքենան դուրս է եկել ճանապարհի երթևեկելի հատվածից և սահել դեպի ձորը. անհրաժեշտ է փրկարարների օգնությունը:
Ինչպես հայտնում են ԱԻՆ լրատվական ծառայությունից, դեպքի վայր է մեկնել մեկ մարտական հաշվարկ:
Պարզվել է, որ Մ-2 ավտոճանապարհի Սիսիան-Վայք հատվածի 39-րդ կմ-ին «Mercedes C180» մակնիշի 34 AR 542 պետհամարանիշով ավտոմեքենան (վարորդ՝ 1983 թ. ծնված Ա. Պ.) դուրս է եկել ճանապարհի երթևեկելի հատվածից և սահել ձորը (մոտ 30 մ):
Ավտոմեքենայի վարորդը և ուղևորներ՝ 1993 թ. ծնված Մ. Հ.-ը, 2015 թ. ծնված Թ., 2016 թ. ծնված Լ. և Ռ. Պ.-երը հոսպիտալացվել են Սիսիանի զինվորական հոսպիտալ, որտեղ ստանալով համապատասխան բուժօգնություն՝ դուրս են գրվել:
Փրկարարներն ավտոմեքենան մոտեցրել են ավտոքարշակին:
