«Շառլ Ազնավուրի «Քեզ համար, Հայաստանը» հրաշալի երգ է, բայց այն չի կարող դառնալ ՀՀ օրհներգը». Ռուբեն Բաբայան
Երևանի Տիկնիկային թատրոնի գեղարվեստական ղեկավար Ռուբեն Բաբայանի կարծիքով՝ Շառլ Ազնավուրի «Քեզ համար, Հայաստանը» հրաշալի երգ է, բայց այն չի կարող դառնալ ՀՀ օրհներգը։
168.am-ի հետ զրույցում նա ասաց, որ «Քեզ համար, Հայաստան» երգը ծնվել է երկրաշարժի օրերին, այսինքն՝ գրվել է հատուկ դեպքի կապակցությամբ, իսկ օրհներգը, ըստ նրա՝ ունի մեծ սահմանափակում. այն կատարում են միայն հատուկ դեպքերում.
«Եվ լավ երգը, եթե դառնում է օրհներգ, կորցնում է իր մատչելիությունը, իր կարևոր իմաստը։ Ես շատ մեծ տեղ չեմ տալիս օրհներգին, չեմ կարծում, որ երկիրը փոխվում է, երբ փոխվում է օրհներգը, ավելի շուտ գուցե հակառակն է»։
Հիշեցնենք, որ «Մեր հայրենիք»-ը «Քեզ համար, Հայաստան»-ով փոխարինելու հավանականության մասին խոսել է Շառլ Ազնավուրը՝ Le Club de Richard Findykian ռադիոհաղորդաշարի ժամանակ։ Նա ասել է, որ Հայաստանի ներկայիս օրհներգն առանձնապես ոչինչ չի ասում, և հնարավոր է, որ իր երգը դառնա ՀՀ նոր օրհներգը։
«Դա այն է, ինչ ես ուզում եմ: Նախագահ Սերժ Սարգսյանը համաձայն է ինձ հետ, և ոչ միայն նա»,- մասնավորապես ասել է Ազնավուրը։
Մշակույթի նախարար Արմեն Ամիրյանն էլ չի հերքել այս տեղեկատվությունը։
Ռուբեն Բաբայանն ընդգծում է՝ օրհներգը պետք է իր մեջ պարունակի անցյալը և ուղղված լինի դեպի ապագան. «Սա պետական սիմվոլ է, մենք ստեղծում ենք պետություն, և հուսով եմ, որ այս պետությունն արդեն կմնա անսասան։ Սա նշանակում է, որ պետք է ուրվագծվեն պետության կարևորագույն հիմունքները՝ ինչի վրա է նա ստեղծված և ինչով կարող է առաջ նայել ու առաջ շարժվել։ Երաժշտությունն էլ պետք է լինի օրհներգային։ Մեր ներկայիս օրհներգը երաժշտության տեսանկյունից այդպիսին չէ, իսկ խոսքերը փոփոխված են. այդպես չպետք է լինի։ Դա որոշակի ժամանակներում ու որոշակի պայմաններում է գրվել, հիմա ուրիշ ժամանակներ են, և ուրիշ խնդիրներ են պետության առջև դրված»։
Մեր զրուցակիցը նկատեց՝ օրհներգն իր մեջ պետք է պարունակի պաշտոնական բնույթ. «Շառլ Ազնավուրի երգը շատ եմ սիրում և չեմ կարծում, թե պաշտոնական օգտագործման համար է»։
Ինչ վերաբերում է օրհներգի ընտրությանը, ապա Ռ. Բաբայանը նշեց, որ Հայաստանում կան և՛ լավ կոմպոզիտորներ, և՛ բանաստեղծներ, որոնք, ըստ նրա՝ ունեն լավ ճաշակ, և կարելի է համապատասխան հանձնաժողով ստեղծել, որոշակի հիմունքներ մշակել, թե ինչպիսին պետք է լինի օրհներգը, մրցույթ հայտարարել և ընտրել. «Համենայնդեպս, չեմ կարծում, որ դա մեկ կամ երկու մարդու որոշելու բան է»։
