«Հարբած բալ». նրբագույն տորթի լավագույն բաղադրատոմսը

Ո՞վ կհրաժարվի տնական տորթից: Հատկապես, եթե այն ավանդական տոնական շոկոլադային տորթ է: Բալերը՝ ներծծված ալկոհոլով, աղանդերին տալիս են անմոռանալի համ: Ընդ որում, այս տորթը բավականին ցածր կալորիականություն ունի:

«Հարբած բալ»

Բաղադրիչներ

1. Ալյուր – 1.5 բաժակ
2. Բալ – 1.5 բաժակ
3. Հավկիթ – 5 հատ
4. Կակաո – 4 ճ/գ
5. Շաքարավազ – 1 բաժակ
6. Սոդա – 1 թ/գ
7. Թթվասեր – 1 բաժակ
8. Գինի (կարմիր, կիսաքաղցր)
9. Մարգարին
10. Շոկոլադե քերուկ
11. Կարագ – 1.5 տուփ
12. Խտացրած կաթ – 1.5 բանկա

Պատրաստման եղանակը

1. Բալերից զգուշությամբ հեռացնել կորիզները:

2. Բանկայի մեջ լցնել բալերը և վրան գինի ավելացնել (այնքան, որպեսզի այն ծածկի բալերը): Կարելի է օգտագործել նաև կոնյակ: Ծածկել բանկան կափարիչով և 1 օր թողնել սենյակային ջերմաստիճանում:

3. Երբ բալը պատրաստ կլինի, անցնել բիսկվիթը թխելուն: Դրա համար՝ հարելով խփել ձվերը շաքարավազի հետ: Ալյուրը խառնել կակաոի հետ:

4. Հետո միացնել իրար հետ շաքարավազով ձուն, կակաոյով ալյուրը, սոդան՝ խառնած թթվասերով: Լավ խառնել:

5. Մարգարինապատել կլոր կաղապարը և մեջը լցնել ստացված խմորը:

6. Թխել նախապես 200 աստիճան տաքացրած ջեռոցում՝ մինչև պատրաստ լինելը: Թխվում է մոտ 25 րոպեում:

7. Պատրաստի բիսկվիթը սառեցնել:

8. Խմորը կիսել 2 մասի:

9. Ստացված 2 շերտերի միջից զգուշությամբ հանել խմորը, ստանալ փորվածքներ՝ 2 սմ հաստության պատերով:

10. Հանած խմորը մանրացնել և լցնել թասի մեջ:

11. Կրեմը պատրաստելու համար հարել կարագը՝ խտացրած կաթի հետ: Մի փոքր կրեմ թողնել զարդարելու համար:

12. Կրեմը լցնել մանրացրած խմորի վրա, ավելացնել 1 բաժակ բալ և մի փոքր գինի: Խառնել ամբողջ զանգվածը:

13. Հետո այդ կրեմային զանգվածը լցնել խմորի շերտերի, փորվածքների մեջ և դնել իրար վրա: Պետք է ընդունի նախնական տեսքը:

14. Վրան շաղ տալ շոկոլադե քերուկը, զարդարել մնացած կրեմով և բալերով: Ցանկության դեպքում, կարելի է տորթը պատել ջնարակով:

Պատրաստեց Անի Գաբուզյանը