Սիրիայում ազատ են արձակվել անցած տարվանից պատանդ վերցված իսպանացի 3 լրագրողները
Սիրիայում անցած տարի պատանդ վերցված 3 իսպանացի լրագրողներն ազատ են արձակվել: Այս մասին հայտնում է Reuters-ը՝ հղում կատարելով Իսպանիայի կառավարության մամուլի քարտուղարի հայտարարությանը: Խոսքը լրագրողներ Անտոնիո Պամլիեգեի, Խոսե Մանուել Լոպեսի և Անխել Սաստրեի մասին է:
Իսպանիայի նախարարների կաբինետի նախագահի պաշտոնակատար Սորայա Սաենս դե Սանտամարիան արդեն խոսել է նրանց հետ:
Իսպանական El Pais պարբերականը, հղում կատարելով Իսպանիայի կառավարությունում իր աղբյուրին, գրում է, որ լրագրողները ներկայում Թուրքիայում են գտնվում, իսկ երկրի իշխանություններն արդեն ինքնաթիռ են ուղարկել նրանց տուն վերադարձնելու համար:
Իսպանացի լրագրողներն անհետ կորել էին անցած տարվա հուլիսին Հալեպում, որը գտնվում էր «Ջաբհաթ ալ-Նուսրա» խմբավորման վերահսկողության ներքո: Նրանք ռեպորտաժ էին պատրաստում քաղաքում ստեղծված վիճակի մասին: Ընդ որում՝ այնտեղ նախկինում ևս լրագրողներ էին անետացել:
El Pais-ի աղբյուրները հայտնում են, որ լրագրողների ազատագրումը հնարավոր է դարձել շնորհիվ Թուրքիայի և Քաթարի օգնության:
