Ռոմելու Լուկակուն ցանկանում է հեռանալ «Էվերթոնից», որպեսզի խաղա Չեմպիոնների լիգայում
Շաբաթ Ռոմելուի հայրը` Ռոջեր Լուկակուն մեծ հարցազրույց է տվել, որտեղ քննարկել է որդու հեռանկարները:
«Ինձ հայտնի է, որ նրա նկատմամբ հետաքրքրություն են ցուցաբերում «Ատլետիկոն», «Բավարիան», «Յուվենթուսը», «Չելսին» և «Մանչեսթեր Յունայթեդը»: Նրա գործակալը նախընտրում է Իտալիան, բայց ըստ իս, Ռոմը պետք է տեղափոխվի կամ «Բավարիա», կամ «Մանչեսթեր Յունայթեդ»»,- ասել է Ռոջեր Լուկակուն Het Laatste Nieuws-ին տված հարցազրույցում:
Նույն օրը Ռոմելուն ինքը հաստատել է թիմը փոխելու պատրաստակամություն:
«Դա իմ հաջորդ քայլն է: Ամռանը ես կդառնամ 23 տարեկան և շատ լավ կլինի, եթե հաջորդ մրցաշրջանում խաղամ Չեմպիոնների լիգայում: Իմ գործակալն այս պահին զբաղվում է դրանով: Իսկ ես ուզում եմ լավ խաղալ, օգնել թիմին հաղթանակներ տանել և շատ գոլեր խփել»,- ասել է Ռոմելուն:
Ընթացիկ մրցաշրջանում Լուկակուն անցկացրած 36 պաշտոնական խաղերում դարձել է 25 գոլի հեղինակ:
Պատրաստեց Անի Գաբուզյանը
