«Մեզանից հետո Հայաստանում քաղբանտարկյալներ չեն եղել». Արմեն Ռուստամյան
«Մեր կուսակցության չափորոշիչները չէ, որ պետք է գնահատական տան՝ քաղաքական բանտարկյա՞լ է, թե՞ ոչ, կան Եվրոպական խորհրդի չափանիշներ… գնահատական պետք է մասնագետները տան, դա չպետք է լինի քաղաքական գնահատական՝ ով, երբ ուզենա՝ իր քաղաքական նախասիրություններից ելնելով՝ ասի՝ ով է քաղաքական բանտարկյալ, ով՝ ոչ»,- այսօր Ազգային ժողովում խոսելով Վարդգես Գասպարիի մասին՝ ասաց ԱԺ ՀՅԴ խմբակցության ղեկավար Արմեն Ռուստամյանը:
Հարցին՝ 1990-ականներին, երբ դաշնակցականներն էիք հայտնվել ճաղերի հետևում, այդ միջազգային կառույցնե՞րն էին ձեզ քաղբանտարկյալ բնորոշել, Ա. Ռուստամյանն այսպես պատասխանեց.
«Դժբախտաբար, չկային այն ժամանակ այն չափորոշիչները, որոնք հիմա գործում են: Այն ժամանակ, երբ մենք բանտերում էինք, անգամ Հայաստանը Եվրոպական խորհրդի անդամ չէր, ու գուցե դա էր սանձազերծել իշխանություններին, որ ինչ ուզենան՝ անեն: Եթե նախորդ փաստերը վերցնեք ու հիմիկվա չափորոշիչներով դիտարկեք, իհարկե, քաղբանտարկյալ էինք, բա քաղբանտարկյալն ինչպե՞ս է լինում: Դժբախտաբար, այն ժամանակ Հայաստանն այդ կառույցի անդամ չէր, ու սանձարձակ գործում էին: Եթե դու պաշտպանին ամիսներով չես տեսնում, չեն հանում զբոսանքի, լողանալ չեն թողնում, դրանք փաստեր են… բայց այն ժամանակ չկային նման չափորոշիչներ, հիմա կան»:
Հարցին՝ ձեզնից հետո Հայաստանում քաղբանտարկյալներ եղե՞լ են, թե՞ ոչ, Ա. Ռուստամյանն այսպես պատասխանեց.
«Նման հինգ չափորոշիչներով հայտարարված քաղբանտարկյալ չի եղել»:
Հարցին՝ եթե ձեր ժամանակ էլ Եվրոպայի խորհրդի չափանիշները գործեին, հնարավո՞ր է՝ դուք էլ չհամարվեիք քաղբանտարկյալ, Ա. Ռուստամյանն այսպես պատասխանեց.
«Դե, ենթադրություններ անել անցյալի և ապագայի հետ կապված՝ այնքան անորոշ է, որ ես չեմ կարող ասել, բայց ես ասում եմ փաստերը, որ այս չափանիշները գործելուց հետո՝ որևէ հայտարարություն, որ Հայաստանում եղել են քաղբանտարկյալներ՝ չի եղել»:
Լրագրողի հարցին՝ Ձեր գնահատմամբ՝ եղե՞լ են, թե՞ ՝ոչ, ՀՅԴ ղեկավարը պատասխանեց, որ ինքը երբեք չի փորձի գնահատել մի բան, որի մասնագետը չէ.
«Ենթադրություններ թող անեն նրանք, ովքեր հետո չեն ամաչում, որ հետո իրենց ենթադրությունները տեղի չունեցան»:
Այն հարցին էլ, թե Մարտի 1-ից հետո՞ էլ չեն եղել քաղբանտարկյալներ, Ա. Ռուստամյանը կրկնեց, որ պետք է լինի գնահատական համապատասխան կառույցների կողմից:
Լրագրողներից մեկը հետաքրքրվեց՝ Դուք արդեն պատասխանատվություն եք կրում, չե՞ք այցելելու Վարդգես Գասպարիին ու հետևեք նրա գործի ընթացքին, Ա. Ռուստամյանը պատասխանեց, որ իրենք դեռ կալանավայր չեն գնացել, բայց միացել են երեկ պատգամավորների ստորագրահավաքին.
«Բայց նաև հետևելու ենք, որ համապատասխան մարմինները դրանով զբաղվեն, հետևում ենք, որ այդ գործընթացը պատշաճ իրականացվի: Թացը չորից պետք է տարբերել, անկախ նրանից՝ տվյալ անձը ում դուրն է գալիս, ում դուրը չի գալիս»:
Դիտարկմանը, թե՝ բազմաթիվ տարիներ են անցել, նորից վիճակը նույնն է՝ լողանալ թույլ չեն տալիս, ծեծում են, Ա. Ռուստամյանը չհամաձայնեց, որ ոչինչ չի փոխվել.
«Շատ բան է փոխվել, ես ինքս գիտեմ այդ տարբերությունը: Խցում ծեծվելը կարող է բոլորովին այլ դրդապատճառներով տեղի ունենալ: Մոտ երեք տարի ես խցում եմ եղել, այնքան ծեծ ու ջարդ է եղել, բայց միշտ չէ, որ դա կազմակերպված է եղել»:
