Կանադացիներին թույլատրել են տանը մարիխուանա աճեցնել
Կանադայի դաշնային դատարանը վճռել է, որ երկրի բնակիչները, ովքեր կարիք ունեն բժշկական մարիխուանայի, ունեն այն աճեցնելու սահմանադրական իրավունք, հայտնում է The Guardian-ը:
Պաշտոնական Օտտավան պետք է համապատասխան փոփոխություններ կատարի օրենսդրությունում կես տարվա ընթացքում:
Կանադայի Բրիտանական Կոլումբիա նահանգի բնակիչների մի խումբ դիմել էր դատարան դեռ 2013թ.: Նրանք բողոքարկում էին պահպանողական կառավարության դրած արգելքը: Հայցվորները պնդում էին, որ պետության առաջարկած բժշկական մարիխուանան չի պատասխանում իրենց պահանջներին որակով ու անհրաժեշտ բաղադրիչների հարաբերակցությամբ, բացի այդ, վաճառվում է թանկ գնով:
Դատավոր Մայքլ Ֆելանը վճռել է, որ բժշկական մարիխուանայի աճեցման իրավունքի սահմանափակումը պայմանավորված չէ այն պատճառներով, որոնք հայտարարվել են արգելքի սահմանման ժամանակ, այն է՝ հոգ տանել առողջության ու անվտանգության մասին:
