Ֆինանսական խնդիրները ֆիզիկական ցավ են պատճառում
Ամերիկացի գիտնականները պարզել են, որ ֆինանսական խնդիրներ ունեցող մարդիկ շատ ավելի մեծ ֆիզիկական ցավ են զգում, քան նրանք, ովքեր իրենց դասում են ապահովվածների թվին: Բացի այդ, դրամական բնույթի խնդիրները բացասաբար են ազդում ցավային շեմի վրա եւ մարդկանց հարկադրում են ավելի հաճախ գործածել ցավազրկողներ: Այս մասին ասված է Psychological Science հանդեսում հրապարակված հոդվածում:
Գիտնականները նման եզրակացությունների են հանգել՝ վերլուծելով վեց անկախ հետազոտությունների արդյունքները: Այսպես, դրանցից մեկում 2008 թվականին հայտնաբերվել է կախվածություն աշխատանքի կորստի եւ ցավազրկողների հավելյալ գործածման միջեւ: Իսկ մյուսում՝ օրինաչափություն, որի համաձայն ճգնաժամային եւ կայուն տարիներին ֆոկուս-խմբերի մարդիկ ավելի հաճախ կամ ավելի հազվադեպ են դիմել բժիշկների: Համապատասխանաբար, ֆինանսական անկայունության շրջաններում մարդիկ ավելի հաճախ են մասնագետների ուշադրությունը հրավիրել հիվանդությունների եւ զգացվող ցավի վրա:
Հետազոտողներին հաջողվել է պարզել, որ տնտեսական անպաշտպանվածության զգացումն ակտիվացնում է տագնապի, վախի եւ սթրեսի հետ կապված մեխանիզմները: Դրանք նման են այն գործընթացներին, որոնք մարդկանց ստիպում են ցավ զգալ:
