«Չմտնեք քաղաքական դաշտ և չփորձեք դիրքադրվել ընդդիմադիր դաշտում». Վահե Հովհաննիսյանը՝ Արման Թաթոյանին
![](https://168.am/wp-content/uploads/2016/02/Vahe-Hovanisyan.jpg)
ԱԺ ԲՀԿ խմբակցության պատգամավոր Վահե Հովհաննիսյանն այսօր ԱԺ նիստում ՄԻՊ թեկնածուի քննարկման ժամանակ հայտարարեց, որ թեկնածուի առաջադրման մեխանիզմը որոշակի խնդիրներ հարուցում է, բայց դա էլ լուծման հաջող բանալի ունի:
«Դուք չպետք է դառնաք ընդդիմադիր գործիչ, դա սխալ ճանապարհ է, չմտնեք քաղաքական դաշտ և չփորձեք դիրքադրվել ընդդիմադիր դաշտում: Ձեր առաքելությունը շատ ավելի բարձր է, քան ընդդիմադիր լինելը»,- ասաց Վ.Հովհաննիսյանը՝ դիմելով ՀՀԿ կողմից ՄԻՊ թեկնածու առաջադրված Արման Թաթոյանին:
Ըստ պատգամավորի՝ պաշտոնը ստանձնելուց անմիջապես հետո Թաթոյանը պետք է մոռանա, որ ՀՀԿ թեկնածուն է եղել, սակայն նա պարտավոր է լինելու աշխատել իշխանության հետ, որպեսզի կարողանա հարցեր լուծել: Վ.Հովհաննիսյանի կարծիքով՝ սուր կոնֆլիկտի գնալու դեպքում, անգամ եթե դա հաճելի է որոշակի շրջանակների, դա կխանգարի աշխատանքին:
Վ.Հովհաննիսյանը դրական գնահատեց, որ ԱԱԾ պետը ևս երիտասարդ է, և կարծես նոր էջ է բացվում: Նա ապագա ՄԻՊ-ին խորհուրդ տվեց թիմ չփնտրել քաղաքական դաշտում, քանի որ համախոհների բանակ կունենա, եթե լինի քաղաքացիական հասարակության պայքարող անհատների կողքին: