Թուրքիայի ԱԳՆ ղեկավարը հայտնել է սիրիացի քրդերի մասին ԱՄՆ-ի դիրքորոշման փոփոխության մասին
Թուրքիայի արտգործնախարար Մևլյութ Չավուշօղլուն հայտարարել է, որ Վաշինգտոնի դիրքորոշումը Սիրիայի քրդերի՝ «Դեմոկրատական միություն» կուսակցության նկատմամբ փոխվել է ու Վաշինգտոնը նրանց ոչ հուսալի գործընկերներ է համարում:
Նախօրեին Թուրքիայի վարչապետ Ահմեդ Դավութօղլուն Սիրիայի քրդերին էր մեղադրել փետրվարի 17-ին Անկարայի ահաբեկչության իրականացման մեջ, սակայն «Դեմոկրատական միություն» կուսակցության առաջնորդ Սալիխ Մուսլիմը հերքել է այդ մեղադրանքները:
«Մենք բավարարված ենք ԱՄՆ-ի ղեկավարության դիրքորոշմամբ, որը հայտարարել է ահաբեկչական «Դեմոկրատական միություն» կուսակցության ոչ հուսալի լինելու մասին: Վերջապես ԱՄՆ-ը հասկանում է խնդրի էությունը: Մենք շատ բավարարված ենք նրանով, որ նախօրեին ԱՄՆ պետքարտուղար Ջոն Քերիի հետ ունեցած զրույցի ընթացքում, թեև մասնակի, սակայն, այնուամենայնիվ, նա փոխել է իր դիրքորոշումը «Դեմոկրատական միություն» կուսակցության նկատմամբ»,- Anadolu գործակալությունը մեջբերել է Չավուշօղլուի արած հայտարարությունը Թբիլիսիում, որտեղ նա գտնվում է այցով:
Նա ափսոսանք է հայտնել, որ Անկարան ու Վաշինգտոնը տարաձայնություններ ունեն այն հարցում, թե որ կազմակերպություններն է հարկավոր համարել ահաբեկչական:
Նա հավելել է, որ ցանկացած համագործակցություն ահաբեկիչների հետ ավելի վտանգավոր երևույթ է, քան «Կարմիր գլխարկի շփումը գայլի հետ հայտնի հեքիաթում»:
