Ռումյան Հովսեփյանը կխաղա «Շիրակում»
«Շիրակ» ֆուտբոլային ակումբի մամուլի ծառայությունից հայտնում են, որ ակումբի մարզչական շտաբը հրաժարվել է իվուարցիներ Կուակու Նդրի Մարսել Լեինսենի, Դիոն Սեդե Ջունի, Կուադիո Էմանուել Կլավիուսի ծառայություններից։ Վերջինս «Շիրակի» կազմում հանդես եկավ «ԼԱ Գելեքսիի» դեմ խաղում։ «Շիրակի» ճամբարից հեռացել են նաև Սևակ Փարսադանյանը (Ռուսաստան) և սերբ Դարկո Ռադոսավլևիչը։
Իսկ այսօր «Շիրակը» պայմանագրեր ստորագրեց երեք ֆուտբոլիստների հետ՝ ամերիկացիներ Էդեր Սմիթ Արեոլանի և Էդգար Էսպինոզանի, ինչպես նաև Ռումյան Հովսեփյանի հետ։ Վերջինս սկսել է գյումրեցիների հետ մարզվել երեկվանից։
Բոլոր երեք պայմանագրերն էլ նախատեսված են մինչև սույն թվականի հուլիսի 31-ը։
Հիշեցնենք, որ վաղը՝ փետրվարի 17-ին, «Շիրակը» կմեկնի երկրորդ ուսումնամարզական հավաքին՝ Սոչի։
Սիրարփի Աղաբաբյան
