2017թ. ընտրությունների արդյունքում մեծամասնություն կկազմի ՀՀԿ-ՀՅԴ կոալիցիան
Քաղաքագետ Ալեքսանդր Իսկանդարյանը կարծում է, որ Հայաստանում մեկնարկել է 2017-ի խորհրդարանական ընտրությունների պատրաստությունը: Նրա խոսքով՝ ներքին քաղաքական գործընթացներն իրենց բնականոն հունով ընթանում են: «Փաստացի սկսել են առաջիկա խորհրդարանական ընտրությունների պատրաստությունները: Դրանք այսուհետ լինելու են հիմնական, քանի որ խորհ րդարանում վերաբաշխումներն են արդեն կարևորվելու»,-ասաց քաղաքագետը: Նրա կարծիքով` հաջորդ խորհրդարանական ընտրությունների արդյունքում Ազգային ժողովի մեծամասնությունը կլինի արդեն ձևավորվող կոալիցիան:
Իսկանդարյանը փաստեց, որ 2017-ի մայիսից մինչև 2018-ի փետրվար Հայաստանում քաղաքական համակեցության շրջան կլինի, երբ խորհրդարանական կառավարման մոդելն ուժի մեջ կմտնի, բայց նախագահը դեռևս կշարունակի կատարել իր գործառույթները: «Նման իրավիճակ էր Վրաստանում, երբ Վրացական երազանքը խորհրդարանում մեծամասնություն էր, իսկ Միխայիլ Սաակաշվիլիի` նախագահի լիազորությունները չէին ավարտվել»,-ասաց քաղաքագետը:
