Արգենտինայում ֆուտբոլիստը կարմիր քարտ ստանալուց հետո գնդակահարել է մրցավարին
Ինչպես հաղորդում է Goal-ը, արգենտինական Կորդովա քաղաքում անցկացվող ֆուտբոլային խաղը ողբերգական ավարտ է ունեցել: 48-ամյա մրցավար Սեզար Ֆլորեսը դաշտից հեռացրել է թիմերից մեկի ֆուտբոլիստին, որից հետո վերջինս վերադարձել է հրազենով և 3 անգամ կրակել է մրցավարի վրա: Ստացած վնասվածքներից Ֆլորեսը մահացել է: Վնասվածքներ է ստացել նաև ֆուտբոլիստ Վալտեր Սարատեն, ում կյանքին արդեն վտանգ չի սպառնում:
«Այդ ամենը կատարվեց խաղի ժամանակ: Մենք չգիտենք, թե ինչ էր կատարվել ֆուտբոլիստի և մրցավարի միջև, բայց ֆուտբոլիստը շատ զայրացած էր, գնաց զենքի ետևից և սպանեց նրան»,- ասել է Ոստիկանության ներկայացուցիչը:
Սպանություն կատարած 25-ամյա ֆուտբոլիստը գտնվում է հետախուզման մեջ:
Պատրաստեց Անի Գաբուզյանը
