Սերբիան պատրաստ է առանց անկախությունը ճանաչելու կարգավորել հարաբերությունները Կոսովոյի հետ
Սերբիան պատրաստ է նորմալացնել հարաբերությունները Կոսովոյի ու Մետոխիայի հետ, սակայն մտադիր չէ ճանաչել նրանց անկախությունը: Այս մասին, ինչպես հայտնում է «Գրուզիա օնլայնը», հայտարարել է Ռուսաստանում Սերբիայի դեսպան Սլավենկո Տերզիչը:
«ԵՄ-ում ասում են, թե Սերբիան պետք է համաձայնագիր կնքի Կոսովոյի ու Մետոխիայի հետ: Մենք պատրաստ ենք նորմալացնել հարաբերությունները Սերբիայի տարածքի մի մասի հետ՝ Կոսովոյի ու Մետոխիայի, սակայն մենք պատրաստ չենք ընդունել այդ մարզերի անկախությունը»,- ասել է դիվանագետը՝ պատասխանելով ԵՄ-ին Սերբիայի պայմաններին վերաբերող հարցին:
«Սերբիայի կառավարությունը պատրաստ է այդ մարզերի հետ բանակցությունների: Մենք պատրաստ ենք նրանց տրամադրել ինքնավարության ամենաբարձր մակարդակ, ոչ ավելին»,- տեղեկացրել է Տերզիչը:
Նա հիշեցրել է, որ Կոսովոն ու Մետոխիան « պատմական Սերբիայի մաս են կազմում, Սերբիայի մշակութային ու հոգևոր ժառանգությունն են, որոնք տուժել են ալբանացի ծայրահեղականներից ու գտնվում են լիակատար ոչնչացման եզրին»:
