«Հավանականությունը, որ շփման գծում լարվածություն առաջանա նույնիսկ թյուրիմացության հետևանքով, իրատեսական է». Ռիչարդ Միլզ
«ԼՂ հակամարտության ռազմական կարգավորում չի կարող լինել»,- իր մեկամյա առաքելության առիթով կազմակերպված ֆեյսբուքյան ճեպազրույցի ընթացքում, պատասխանելով ԱՄՆ արտաքին քաղաքականությանը վերաբերող հարցերին, ասաց ՀՀ-ում ԱՄՆ արտակարգ և լիազոր դեսպան Ռիչարդ Միլզը:
Հարցին, թե ԼՂ հակամարտության լուծման ի՞նչ հնարավորություններ է տեսնում և արդյոք բավարա՞ր են ԵԱՀԿ Մինսկի խմբի ջանքերը՝ խաղաղ կարգավորմամբ հարցի լուծման ուղղությամբ, դեսպանը պատասխանեց, որ Լեռնային Ղարաբաղի հակամարտության երկարատև ռազմական կարգավորում չի կարող լինել: Նրա խոսքով` բռնության ողբերգական լարվածությունը շփման գծում ԱՄՆ կառավարության համար անհանգստության առարկա է:
«Հավանականությունը, որ լարվածություն առաջանա շփման գծում նույնիսկ թյուրիմացության կամ սխալի հետևանքով իրատեսական է, իմ կարծիքով: Այդ պատճառով Մինսկի խմբի համանախագահները կողմերին զգուշացրել են քայլեր ձեռնարկել բռնության մակարդակը շփման գծում մեղմելու ուղղությամբ և ներդնելու մեխանիզմներ իրավիճակի մոնիտորինգի նպատակով: Սա քննարկման առարկա է եղել, երբ երկու նախագահները հանդիպել են Բեռնում` Շվեյցարիայում դեկտեմբեր ամսին: ԱՄՆ համանախագահ Ջեյմս Ուորլիքը մյուս համանախագահների հետ ներգրավված է երկխոսությունը առաջ մղելու գործընթացում»,- ասաց Միլզը:
