Հալեպից հեռացել է 50 հազար մարդ. Կարմիր խաչ
Սիրիայի Հալեպ նահանգում մարտական թեժ գործողությունների հետևանքով մոտ 50 հազար մարդ է ստիպված եղել լքել իր տունը, հայտնում է Կարմիր խաչի միջազգային կոմիտեն, տեղեկացնում է BBC-ի ռուսական ծառայությունը:
Մարդասիրական իրավիճակը նահանգում սրընթաց վատանում է, ջրամատակարարումը Հալեպ քաղաքում խափանվել է վերջին երկու շաբաթներին, քանի որ վնասվել են պոմպակայանները, հայտնել են կազմակերպությունից:
Բացի այդ՝ ներկայում անհասանելի են մարդասիրական մատակարարումների որոշ երթուղիներ, խաղաղ բնակիչները զգում են վառելիքի ու էլեկտրականության պակաս:
Բազմաթիվ մարդիկ, փախչելով ռազմական գործողություններից, հավաքվել են թուրքական սահմանի մոտ
Նախօրեին Բրիտանիայում տեղակայված Մարդու իրավունքների սիրիական դիտորդական կենտրոնը հայտնել է, որ Հալեպ նահանգում սկսվել է Սիրիայի կառավարական բանակի առաջխաղացում ռուսական ավիացիայի օգնությամբ, ինչի հետևանքով զոհվել է ավելի քան 500 մարդ, այդ թվում՝ տասնյակ խաղաղ բնակիչներ:
