Պոլսահայի դաժան սպանության մեջ նշվում են հայաստանցիների անուններ
Թուրքական մամուլը շարունակում է անդրադառնալ անցյալ շաբաթ Պոլսո Ջումուրիեթ պողոտայում Դեմիրճիների տան վրա կատարված հարձակման թեմային: Ինչպես հայտնել էր arevelk.am-ը՝ հարձակման հետևանքով հանցագործների կողմից շղթաներով կապվելուց հետո մահացել է 87-ամյա Հակոբ Դեմիրճին (Յաղուբ) ու նրա կինը` 79-ամյա Սեդա-Աիդա Դեմիրճին: Հանցագործները տնից տարել են մեծ քանակությամբ գումար և ոսկեղեն:
Ըստ թուրքական մի շարք լրատվամիջոցների, ոստիկանությունն արդեն իր հսկողության տակ է առել ութ հոգի, որոնք կասկածվում են հարձակմանն աջակցելու մեջ: Նրանցից հինգը կանայք են: Ոստիկանությունը նրանց ուղղությունը գտել է տան շրջակայքում տեղադրված տեսախցիկների օգնությամբ: Միաժամանակ նշվում է, որ խուզարկության վայրում հայտնաբերվել են մի քանի կեղծ անձնագրեր, ըստ թուրքական մամուլի, հանցագործները պատրաստվում էին Տրապիզոնով անցնել Վրաստան:
Թեև ոստիկանությունը դեռևս այս դեպքի առթիվ պաշտոնական հաղորդագրություն չի հրապարակել, սակայն որոշ թուրքական կայքեր գրում են, թե հանցագործությունը կատարողների մեջ կան հայաստանցիներ:
Ինչպես տեղեկացրել էինք, հարձակման ենթարկված տունը պատկանում է Ստամբուլի «Փակ շուկայի» «Ֆելեմենք» ոսկերչական հաստատության սեփականատեր Հակոբ Դեմիրճիին, որն էլ զոհ է գնացել դաժան հանցագործությանը:
