Գրիբոյեդովի մասին ֆիլմի նկարահանումները Թուրքիայից կտեղափոխվեն Իրան
Դիվանագետ, «Խելքից պատուհաս» պիեսի հեղինակ Ալեքսանդր Գրիբոյեդովի (1795-1829) մասին պատմող նոր ֆիլմի նկարահանումները, որոնք նախատեսված էին նկարահանել Թուրքիայում, կարող են տեղափոխվել Թեհրան, հայտարարել է ՌԴ Կինեմատոգրաֆիստների միության նախագահ Նիկիտա Միխալկովը:
«Մեզ մոտ է գտնվում «Ալեքսանդր Գրիբոյեդովի կյանքն ու մահը» հիանալի սցենարը: Մենք այն գրել ենք 30 տարի առաջ ու այդ ժամանակ չկարողացանք նկարահանել Ղարաբաղի պատճառով: Սակայն մենք այսօր պատրաստ ենք այն նկարահանել, մենք ողջ բնապատկերները գտել էինք Թուրքիայում, սակայն այսօր ինչ Թուրքիա … Սպասում ենք»,- ասել է Միխալկովը՝ Կինոյի տարվան նվիրված դասախոսությամբ ելույթ ունենալով Պետդումայում:
Միևնույն ժամանակ, կա հավանականություն, որ կստացվի նկարահանումներ իրականացնել Իրանում: «Ես խոսել եմ Իրանի դեսպանի հետ, կարող է, միանգամայն իրական լինել Թեհրանում նկարահանումներ անելը»,- նշել է Միխալկովը, ում խոսքերը մեջբերում է Interfax-ը:
Նրա խոսքով՝ ինքը սցենարը գրել է 5 տարում, ինչի արդյունքում աշխատանքի ընթացքում հայտնաբերվել են «անհավանական փաստաթղթեր», այդ թվում՝ ՌԴ ԱԳՆ-ում:
