Կանադան կդադարեցնի ԴԱԻՇ-ի ռմբակոծությունները
Կանադան կդադարեցնի մասնակցությունը ԴԱԻՇ-ի դեմ մղվող ռազմական գործողություններին փետրվարի 22-ից ոչ ուշ: Այս մասին հայտարարել է Կանադայի վարչապետ Ջասթին Տրյուդոն CBC հեռուստաալիքի եթերում:
«Կարևոր է հասկանալ, որ այն ժամանակ, երբ ավիահարվածները կարող են շատ օգտակար լինել կարճաժամկետ նպատակների համար, նրանք չեն օգնում կայունություն հաստատել»,- բացատրել է նա:
Տրյուդոյի խոսքով՝ իր երկիրը կշարունակի զգալի դեր կատարել ԴԱԻՇ-ի զինյալների առաջխաղացումը զսպելու հարցում: Այսպես, կավելանա կանադացի այն մասնագետների թիվը, որոնք սովորեցնում են տեղի անվտանգության ուժերին ահաբեկչության դեմ պայքարի մեթոդներ: Բացի այդ՝ Օտտավան կշարունակի իր մասնակցությունը մարդասիրական առաքելություններում:
Միաժամանակ, Կանադայի վարչապետը հայտարարել է, որ կավելանա զինծառայողների թիվը, որոնք կմասնակցեն Իրաքի զինված ուժերի մարզումներին:
Ներկայում ԴԱԻՇ-ի դեմ օպերացիաներին Կանադայի կողմից մասնակցում է մոտ 600 կանադացի զինծառայող ու մոտ 70 հատուկ ջոկատային, որոնք մարզում են քրդական խմբավորումների անդամներին:
