Արթուր Սաքունցը և Տիգրան Խզմալյանը տարածել են խնդրագիր՝ բոլոր քաղբանտարկյալներին ազատ արձակելու պահանջով
Մեկ ամսից լրանում է նորանկախ Հայաստանի Հանրապետության պատմության ամոթալի եւ ողբերգական իրադարձության՝ Մարտիմեկյան ջարդի ութերորդ տարելիցը: Այդ օրը իշխանությունները առաջին անգամ կրակեցին Հայաստանի Հանրապետության քաղաքացիների վրա, որի հետևանքով սպանվեցին տասը քաղաքացիներ և հարյուրավորները ստացան տարբեր աստիճանի ֆիզիկական վնասվածքներ և տասնյակ քաղաքացիներ ազատազրկվեցին իրենց քաղաքական հայացքների համար։ Դա անթույլատրելի հարված էր Հայաստանի Հանրապետության՝ որպես Եվրոպայի Խորհրդի անդամ երկրի ժողովրդավարությանը։
Այս ողբերգությունը դեռևս չի ստացել իր համարժեք իրավական և քաղաքական գնահատականը։ Անպատժելիությունը ծնեց նորանոր հանցանքներ պետության եւ նրա քաղաքացիների դեմ, հանգեցնելով խորն անջրպետի հասարակության եւ իշխանություններին միջեւ: Անկախ Հայաստանում այսօր կրկին քաղաքական բանտարկյալներ կան, որոնք անազատության մեջ են ոչ թե հանցագործության կատարման մեղադրանքով, այլ իրենց ազատատենչության եւ այլախոհության պատճառով: Հայաստանի քաղաքացիական հասարակության անունից դիմում ենք Ձեզ առաջարկով մինչեւ ս.թ. մարտի 1-ը ազատ արձակել բոլոր քաղբանտարկյալներին՝ կիրառելով ՀՀ նախագահին տրված սահմանադրական իրավունքը:
Մեր պետության եւ նրա քաղաքացիների առջեւ խոյացող մարտահրավերների օրոք նման որոշումը կարող է լինել ժողովրդավարության և իրավական պետության սահմանադրական արժեքների նկատմամբ համազգային համերաշխության, վստահության և հավատի վերականգնման ճանապարհին կարեւոր, գիտակցված և անհրաժեշտ քայլ: Մենք դիմում ենք Հայաստանի քաղաքացիներին եւ աշխարհասփյուռ հայությանը, միջազգային հանրությանը եւ իրավապաշտպան կազմակերպություններին, խնդրանքով առցանց ստորագրել այս նամակը եւ այդպիսով սատարել Հայաստանի Հանրապետությունում քաղաքական բանտարկյալներին ազատելու մարդասիրական պահանջը:
Արթուր Սաքունց, իրավապաշտպան
Տիգրան Խզմալյան, կինոռեժիսոր
Հելսինկյան Քաղաքացիական Ասամբլեայի Վանաձորի գրասենյակ
