Հզոր պայթյուններ Դամասկոսում. սպանվել է նվազագույնը 50 մարդ
Կիրակի օրը Սիրիայի մայրաքաղաք Դամասկոսի Սաիդ Զեյնաբ կոչվող շիական դամբարանի հարևանությամբ տեղի ունեցած պայթյունները խլել են նվազագույնը 50 մարդու կյանք, հայտնում է BBC-ն:
Պայթյուններից տուժել է ավտոբուսի կանգառն ու շինությունը, որտեղ գտնվել են զինվորականները: Պաշտոնական տվյալների համաձայն՝ պայթյուններն իրականացրել է երկու մահապարտ ահաբեկիչ, սակայն ականատեսները հաղորդում են երեք պայթյունի մասին:
Սիրիայի հեռուստատեսությունը ցուցադրել է այրվող շինությունների ու վնասված ավտոմեքենաների կադրեր: BBC-ի թղթակիցը հաղորդում է լուրջ ավերածությունների մասին:
Հարձակումը տեղի է ունեցել այն ժամանակ, երբ Սիրիայի կառավարության ու ընդդիմության ներկայացուցիչները հավաքվել էին Ժնևում՝ բանակցելու հակամարտության քաղաքական լուծման շուրջ: ԵՄ ներկայացուցիչը հայտարարել է, որ հարձակման նպատակը, որի պատասխանատվությունն ստանձնել է ԴԱԻՇ-ը, եղել է խաղաղ բանակցությունները խափանելը:
Սիրիայի կառավարության ու ընդդիմության ներկայացուցիչները ներկայում գտնվում են Ժևնում, սակայն բանակցությունները դեռ չեն սկսվել:
Գլխավոր ընդդիմադիր խմբավորումը պահանջում է, որ Սիրիայի կառավարությունը կատարի մարդասիրական ոլորտում իր պահանջները:
ԱՄՆ պետքարտուղար Ջոն Քերին կոչ է արել հակամարտող կողմերին օգտագործել այդ հնարավորությունը արնահեղությունը դադարեցնելու համար:
