Աբխազիան հրաժարվում է թուրքական ձկից, բանջարեղենից ու մրգերից
Աբխազիայի վարչապետ Արթուր Միկվաբիան հաստատել է թուրքական սննդամթերքի ցանկը, որի ներկրումը ինքնահռչակ հանրապետության տարածք արգելվելու է, հայտնում է BBC-ի ռուսական ծառայությունը:
Ցանկում, որը հրապարակվել է Աբխազիայի կառավարության կայքում, ներառված են ձկան բոլոր տեսակները, կարտոֆիլը, պոմիդորը, սոխը, կաղամբը, վարունգը, ցիտրուսայինները, խաղողը, սեխը, ինչպես նաև միրգը (խնձոր, տանձ, սալոր, կեռաս, դեղձ):
Այդ մթերքները կարգելվեն Աբխազիա ներմուծել 2016 թվականի մարտի 1-ից: Ընդ որում, նշվում է, որ սահմանափակումները չեն տարածվելու այն մթերքի վրա, որը Աբխազիա է բերվում անձնական օգտագործման նպատակով:
Միաժամանակ, Միկվաբիան հաստատել է Աբխազիայի տարածքում Թուրքիայի ենթակայության տակ գտնվող ոչ կոմերցիոն կազմակերպությունների աշխատանքի արգելումը:
Աբխազիայի կառավարությունը հունվարի սկզբին՝ ՌԴ նախագահի օգնական Վլադիսլավ Սուրկովի այցից հետո, որոշել էր Թուրքիայի նկատմամբ կիրառել նույնպիսի սահմանափակումներ, ինչպիսին ավելի վաղ Ռուսաստանն էր կիրառել:
Ընդ որում, նշվել էր, որ Թուրքիան Ռուսաստանից հետո երկրորդ տեղում է Աբխազիայի հիմնական առևտրային գործընկերների ցանկում:
Աբխազիայի ամենամյա առևտրաշրջանառությունը Թուրքիայի հետ գնահատվում է շուրջ 32 միլիոն դոլար:
