Որոշվել է Գեորգի Կվիրիկաշվիլիին առաջադրել Վրաստանի վարչապետի պաշտոնում
Վրաստանի վարչապետի պաշտոնում առաջադրվել է երկրի արտգործնախարարի պաշտոնակատար Գեորգի Կվիրիկաշվիլին: Նման որոշում նիստի ժամանակ կայացրել է Վրաստանի խորհրդարանական մեծամասնությունը, որը կազմված է «Վրացական երազանք» իշխող կոալիցիայի անդամներից, հայտնում է «Գրուզիա օնլայնը»:
«Գեորգի Կվիրիկաշվիլին այն քաղաքական ընտանիքի ներկայացուցիչն է, որին պատկանում է նաև Իրակլի Ղարիբաշվիլին ու ընդունվելու է որպես ղեկավարներից մեկը, ինչպես Բիձինա Իվանիշվիլին»,- հայտարարել է «Վրացական երազանք» խմբակցության ղեկավար Գեորգի Վոլսկին:
Նրա խոսքով՝ խորհրդարանական մեծամասնության անդամները խորհրդարանի խոսնակի հետ քննարկել են վարչապետի թեկնածությունը: Վոլսկին նաև հաստատել է, որ թեկնածությունը համաձայնեցվել է Բիձինա Իվանիշվիլիի հետ:
«Խոսքը 4 թեկնածուի մասին էր, ու մենք կանգ առանք նրանցից մեկի՝ Գեորգի Կվիրիկաշվիլիի վրա»,- հայտարարել է Վոլսկին:
Այսօր նա կներկայացվի խորհրդարանական մեծամասնությանը՝ որպես Վրաստանի վարչապետի թեկնածու:
Հիշեցնենք, որ Վրաստանի արդեն նախկին վարչապետ Իրակլի Ղարիբաշվիլին պաշտոնից հրաժարվելու մասին հայտարարել է դեկտեմբերի 23-ին:
