Վրաստանի վարչապետը հրաժարական է ներկայացրել
Վրաստանի վարչապետ Իրակլի Ղարիբաշվիլին հրաժարական է ներկայացրել: Այս մասին նա հայտարարել է այսօր Վրաստանի կառավարության ադմինիստրացիայում արտակարգ ճեպազրույցի ժամանակ, հայտնում է «Գրուզիա օնլայնը»:
Ղարիբաշվիլին շնորհակալություն է հայտնել կոալիցիայի իր համախոհներին, կառավարության անդամներին ու իր ընտանիքին: «Ես այսօր լքում եմ այդ պաշտոնը, սակայն մնում եմ մեր երկրի հավատարիմ զինվորը»,- ասել է Ղարիբաշվիլին:
Վրաստանի Սահմանադրության համաձայն՝ երկրի վարչապետի հրաժարականի դեպքում ավտոմատ կերպով դադարեցվում են կառավարության ողջ կազմի լիազորություններն ,ու կառավարության անդամները դառնում են պաշտոնակատարներ: Վարչապետի հրաժարականից հետո խորհրդարանական մեծամասնությունը պետք է անվանի երկրի վարչապետի թեկնածուի անունը ու ներկայացնի նախագահին 1 շաբաթվա ընթացքում:
7 օրից ոչ ուշ նախագահը պետք է հայտարարի երկրի վարչապետի թեկնածուի անունն ու ներկայացնի խորհրդարանին հաստատելու համար: Ենթադրվում է, որ Վրաստանի վարչապետի պաշտոնի թեկնածու է հայտարարվելու Վրաստանի արտգործնախարար Գեորգի Կվիրիկաշվիլին:
Հիշեցնենք, որ այսօր առավոտից վրացական ԶԼՄ-ները, հղում կատարելով անանուն աղբյուրներին, տեղեկություն են տարածում այն մասին, թե սպասվում է Վրաստանի վարչապետ Իրակլի Ղարիբաշվիլիի հրաժարականը:
