Ամստերդամ-Փարիզ գնացքի ուղևորներին փրկած տղամարդիկ կարժանանան Ֆրանսիայի բարձրագույն պարգևին
Բրիտանացի Քրիս Նորմանն ու ամերիկացիներ Սփենսեր Սթունը, Էնթոնի Սեդլերն ու Ալեք Սկառլատոսը, ովքեր նախօրեին Ամստերդամ-Փարիզ գնացքում վնասազերծել էին մի զինված տղամարդու, կարժանանան Ֆրանսիայի բարձրագույն պարգևին, հայտնում է BBC-ի ռուսական ծառայությունը:
Հաղորդվում է, որ Պատվավոր լեգեոնի օրդենը զբոսաշրջիկներին կհանձնի անձամբ Ֆրանսուա Օլանդը: Այսօր Փարիզ կժամանի նաև Բելգիայի վարչապետ Շառլ Միշելը:
Հիշեցնենք, որ զինված 26-ամյա մարոկկացի տղամարդը հրաձգություն էր բացել գնացքում ուրբաթ երեկոյան: Դեպքը տեղի էր ունեցել Ֆրանսիայի հյուսիս-արևելքում գտնվող Արաս քաղաքի մերձակայքում: Հարձակվողին մի քանի րոպե անց կարողացել էին չեզոքացնել անձամբ ուղևորները: Գնացքը վթարային կանգառ էր կատարել, որտեղ էլ չարագործին հանձնել էին ոստիկանների ձեռքը:
Ինչպես հայտարարել էր Ֆրանսիայի ներքին գործերի նախարար Բերնար Կազնևը, մարոկկացին առնչություն ունի ինչ-որ արմատական իսլամիստական շարժման հետ:
