Մեքսիկայում հրապարակվել է նարկոբարոն Գուսմանի բանտից փախչելու տեսագրությունը
Մեքսիկական իշխանությունները հրապարակել են «Ալտիպլանո» բանտի տեսահսկման սարքերի տեսագրությունը, որտեղ երևում է, թե ինչպես է նարկոբարոն Խոակին Գուսմանը պատրաստվում փախուստին, հայտնում է BBC-ի ռուսական ծառայությունը:
Կադրերում երևում է, թե ինչպես է Գուսմանը մի քանի անգամ գնում-գալիս իր բանտախցում, ապա մտնում է լոգախցիկն ու անհետանում:
Ավելի ուշ բանտախցում ոստիկանները անցք էին հայտնաբերել, որը տանում է դեպի մեկուկես կիլոմետր երկարություն ունեցող թունելը: Հենց թունելի օգնությամբ էլ նարկոբարոնը դուրս է եկել բանտից:
Հիշեցնենք, որ Գուսմանը կալանավորվել էր 2014թ. փետրվարին Սինալոա նահանգում մեքսիկացի ու ամերիկացի թմրաոստիկանների համատեղ օպերացիայի ընթացքում: Նրան ձերբակալել էին Մասատլան զբոսավայրի հյուրանոցներից մեկում:
Հուլիսի 12-ին հայտնի էր դարձել, որ նարկոբարոնը երկրորդ անգամ է փախչել խիստ ռեժիմի բանտից:
Մեքսիկայի ՆԳՆ-ից կարծում են, որ նրա փախուստին առնչություն ունեն նաև բանտի աշխատակիցները:
