Պերմում բնակելի 5 հարկանի շենք է փլուզվել, կան տուժածներ
Պերմ քաղաքում բնակելի 5 հարկանոց շենք է փլուզվել: Երեք մարդ հոսպիտալացվել է: Օպերատիվ տեղեկությունների համաձայն՝ փլատակների տակ կարող է գտնվել 1941 թվականին ծնված մի կին, ով ապրել է երկրորդ հարկում: Նրան ներկայում որոնում են կինոլոգները:
Փլուզման պատճառներից մեկը քննիչները համարում են գրասենյակային տարածքի վերապլանավորումը, Interfax-ին հայտնել են շրջանի քննչական կոմիտեի մամլո ծառայությունից:
«Դիտարկվում է տարբերակը, որ գրասենյակային տարածքներից մեկում, որը գտնվում է քանդված շինության առաջին հարկում, եղել է վերապլանավորում: Ենթադրաբար, գրասենյակային տարածքում կարող էր խանութ լինել»,-հայտնել է գործակալության զրուցակիցը:
Ավելի վաղ քննչական կոմիտեից հայտնել էին, որ շենքի փլուզման պատճառը կարող էր լինել շինության կոնստրուկցիայի թուլացումը:
Դեպքի փաստով հարուցվել է քրեական գործ ՌԴ ՔՕ 238 հոդվածի հատկանիշներով:
