Եկատերինա Զգուլաձեն կարող է գլխավորել Ուկրաինայի ազգային ոստիկանությունը. Արսեն Ավակով
Ուկրաինայի ներքին գործերի նախարարի տեղակալ Եկատերինա (Էկա) Զգուլաձեն կարող է գլխավորել նոր Ազգային ոստիկանությունը: Այս մասին 24 հեռուստաալիքին տված հարցազրույցում հայտարարել է Ուկրաինայի ՆԳՆ նախարար Արսեն Ավակովը:
«Իմ կարծիքով՝ տրամաբանական կլիներ, եթե այդ պաշտոնը զբաղեցնի Եկատերինա Զգուլաձեն, սակայն կան գործընթացի նաև այլ տրամաբանություններ, օրինակ՝ նրա ցանկությունը կամ մեր ցանկությունները՝ նրա հմտությունները օգտագործել մյուս բոլոր համալիր բարեփոխումների համար: Մենք այդ հարցը քննարկում ենք»,-նշել է Ավակովը:
Վերջինիս խոսքով՝ այդ որոշման իրենք «կհանգեն 3 ամիս անց»:
«Մենք ոստիկանության ղեկավարության մասին որոշում կկայացնենք այն պահին, երբ «միլիցիա» բառը ընդհանրապես դուրս կգա շրջանառությունից»,-հայտարարել է Արսեն Ավակովը:
