Ըստ ՄԺԾԾ-ի՝ կառավարությունն այս տարի կանխատեսում է 1% տնտեսական աճ
ՀՀ կառավարության վաղվա նիստում ֆինանսների նախարար Գագիկ Խաչատրյանը կներկայացնի ՀՀ 2016-2018 թվականների պետական միջնաժամկետ ծախսերի ծրագիրը:
Ըստ որոշման նախագծի՝ այս ծրագրի հիմնական նպատակը պետական ծախսերի կառավարման համակարգի արդյունավետության բարձրացումն է: Նշվում է, որ առաջիկա 3 տարվա ՀՀ պետական միջնաժամկետ ծախսերի ծրագրի մշակումը հնարավորություն է ստեղծում կառավարության համար կառավարելու պետական հատվածի ֆինանսական ռեսուրսներն իր միջնաժամկետ հարկաբյուջետային նպատակներին և քաղաքականության գերակայություններին համապատասխան: Դրա հաստատումը հնարավորություն կտա անցնել հաջորդ տարվա բյուջեի մշակմանը:
Ըստ ՄԺԾԾ-ի՝ կառավարությունն այս տարի կանխատեսում է 1% տնտեսական աճ, 2016-ին՝ 2%, 2017-ին` 3.5%, 2018-ին՝ 4%: Ներդրումների մակարադակը այս տարիներին կկազմի ՀՆԱ-ի մոտ 20%-ը, իսկ գնաճը չի գերազանցի 4%:
Նշելով, որ 2012-2014 թվականներին տնտեսության զարգացումը շարունակվել է հիմնականում ծառայությունների և գյուղատնտեսության հաշվին, ՀՀ կառավարությունը հետագա 3 տարիների համար ՀՆԱ-ի միջին 3.2% կանխատեսվող աճը հիմնականում կրկին պայմանավորում է ծառայությունների և գյուղատնտեսության ճյուղերով: Արդյունաբերության աճը հույսեր չի ներշնչում:
