Ֆրանսիան մերժել է քաղաքական ապաստան տրամադրել Ասանժին
Ֆրանսիայի իշխանությունները մերժել են քաղաքական ապաստան տրամադրել WikiLeaks-ի հիմնադիր Ջուլիան Ասանժին, հայտնում է BBC-ի ռուսական ծառայությունը:
Ելիսեյան պալատի պաշտոնական պատասխանում ասվում է, որ իրավիճակը, որում հայտնվել է Ասանժը, նրա կյանքին անմիջականորեն չի սպառնում: Բացի այդ՝ հաղորդագրությունում ասվում է, որ WikiLeaks-ի հիմնադրի նկատմամբ հայտարարված է համաեվրոպական հետախուզում:
Ավելի վաղ հայտնի էր դարձել, որ Ասանժը բաց նամակ է գրել Ֆրանսիայի նախագահ Ֆրանսուա Օլանդի անունով՝ խնդրելով իրեն քաղաքական ապաստան տրամադրել: Նամակը հրապարակել էր Le Monde թերթը այսօր՝ Ասանժի ծննդյան օրը:
Մեծ Բրիտանիայի իրավապահ մարմինները Ասանժին չեն թույլատրում լքել երկրի տարածքը ու խոստանում են նրան կալանավորել Շվեդիայի հարցման համաձայն, հենց նա հայտնվի փողոցում: Դրա հետ կապված՝ Ասանժը բնակվում է Լոնդոնում Էկվադորի դեսպանությունում:
