ՀՅԴ-ն Տարոնին թաղապետ կդարձնի
«Չնայած իշխանությունը արդեն իսկ սկսել է օգտագործել իր վարչական ողջ ռեսուրսները Երևանի ավագանու ընտրություններում հաղթելու համար, բայց փոփոխություն, այնուամենայնիվ, ակնկալվում է»,- ինչպես փոխանցում է «Ա1+»-ը, այսօր լրագրողների հետ հանդիպման ժամանակ ասել է «Հայ Յեղափոխական դաշնակցություն» խմբակցության քարտուղար, ՀՅԴ ԳՄ փոխներկայացուցիչ Աղվան Վարդանյանը ։
Խոսելով ներկայիս քաղաքապետ Տարոն Մարգարյանի մասին, դաշնակցության ներկայացուցիչը նշել է, որ չի կիսում այն կարծիքը, որ նա վերջին 20 տարիների ամենալավ քաղաքապետն է. «Տարոն Մարգարյանը ժամանակին եղել է շատ լավ թաղապետ։Կարծում եմ այս ընտրություններից հետո նա կարող է կրկին վերադառնալ և Ավանում թաղապետ լինել»։
Պարոն Վարդանյանը ասել է, որ այս ընտրություններին դաշնակցությունը իր բոլոր հնարավորություններով է մասնակցում.«Մենք ունենք թիմ, սկզբունքներ, անձի կամ անհատի կուսակցություն չենք։ Ճիշտ է, մենք էլ ենք թերություններ ունեցել ,բայց մեր սկզբունքներից չենք շեղվել»։
