Գալուստ Սահակյանը՝ Վարդան Ղուկասյանի մասին. Փողոցում, այստեղի Ազատության հրապարակում էլ մարդիկ ինչ ասես՝ հայտարարում են
«Հիմա յուրաքանչյուրն իր փոխհարաբերությունից ելնելով իբր տեսակետն է ասում, թող ասեն, բան չի, ավելի լավ է ասեն, հանգստանան, քան ներսում պայթեն»,- ԳԱԼԱ-ի հետ զրույցում ասել է ՀՀԿ խմբակցության ղեկավար Գալուստ Սահակյանը՝ մեկնաբանելով Գյումրիի նախկին քաղաքապետ Վարդան Ղուկասյանի՝ երեկ Գյումրու հեռուստաընկերություններից մեկում հնչեցրած գնահատականը, թե «ՀՀ պետական համակարգը կրիմինալ է»:
«Կրիմինալ աշխարհի հետ ինձ որ կապում են… նախ ընչի՞ հմի կրիմինալ աշխարհ էլ կա՞: Կրիմինալը սաղ պետական… պետական կառույցն է ամենաուժեղ կրիմինալն այսօր… Էդ խեղճերն ի՞նչ են արել, սաղ գաղութները չորցած-նստած են էլի էդ խեղճ տղեքը, ի՜նչ են արել: Ի՜նչ կրիմինալ, դիտավորյալ կրիմինալի հետ են ինձ կապում, որ նորից խփեն քաղաքական ձևով, գցեն կրիմինալ աշխարհի վրա… ո՞ւր ա կրիմինալ աշխարհ, 80 տոկոսը իրենց հետ կապված մարդիկ են, ի՜նչ կրիմինալ, ի՜նչ բան, ի՜նչ լախանա, ի՜նչ ֆայտոն…»,- ասել էր Վարդան Ղուկասյանը:
ՀՀԿ խմբակցության ղեկավար Գալուստ Սահակյանը սկզբում չի ցանկացել մեկնաբանել Վ. Ղուկասյանի այս հայտարարությունը՝ ասելով.
«Չեմ կարծում, որ ես այդ գործիչն եմ, որ այսպիսի հայտարարությունները պետք է մեկնաբանեմ: Էսօր պատահական բոլորն էլ ինչ-որ մի բան կարող են ասել: Պետք է հասկանալ՝ ինչի՞ համար է ասում, ի՞նչ հարցադրում է եղել…
Նման ելույթները, մոտեցումներն ու հայտարարությունները իմ թեման չեն, ես ավելի լուրջ և լավ դերակատարում ունեմ: Փողոցում, այստեղի Ազատության հրապարակում էլ մարդիկ ինչ ասես հայտարարում են՝ մեկը մի պահանջով, մյուսը՝ մեկ այլ պահանջով, բազմաթիվ հայտարարություններ են անում: Խնդիրն այն է, որ անգամ այդ հայտարարությունները նպաստելու են, որ բարեփոխումները ավելի ռեալ իրականացնենք»:
Իսկ ընդհանուր առմամբ, ասում եմ, մարդիկ կան խնդիրներ ունեն, և նման հայտարարությունները համարում եմ դատապարտելի և ոչ խոհեմ: Մենք անընդհատ բացասական իրավիճակի մեջ ենք ընկնում փոխհարաբերությունների պատճառով: Հիմա յուրաքանչյուրն իր փոխհարաբերությունից ելնելով՝ իր տեսակետն է ասում, թող ասեն, բան չի, ավելի լավ է՝ ասեն, հանգստանան, քան ներսում պայթեն»:
