Փողերը տանում են. մամուլ
«Հայկական Ժամանակ» օրաթերթը գրում է. «Հետաքրքիր իրադարձություններ են տեղի ունենում մեր ֆինանսական շուկայում: Բանկային համակարգին մոտ կանգնած մեր աղբյուրները տեղեկացնում են, որ Հայաստանից արտարժույթի հոսք է սկսվել և դա ազդում է բանկերի վրա:
Ըստ այդ տեղեկությունների, դեպքեր են գրանցվել, որ որոշ գործարարներ բանկերում անշարժ գույք են գրավադրում և ստացված վարկը տեղափոխում ՀՀ սահմաններից դուրս: Թերևս դրանով է պայմանավորված վերջին շրջանում դրամի շոշափելի արժեզրկման միտումը, ինչը երկրում արտարժույթի ծավալների նվազման հետևանք է: Թե որն է գործարարների նման պահվածքի պատճառը, անհասկանալի է:
Ինչ վերաբերում է դրամի փոխարժեքին, ապա երեկ ֆոնդային բորսայում մեկ դոլարի գինը կազմել է 414 դրամ 49 լումա, որը մի փոքր ցածր է նախորդ օրվա ցուցանիշից: Դատելով գործարքների ծավալից՝ ավելի քան 6 միլիոն դոլար, կարելի է հաստատապես պնդել, որ դրամի արժեզրկումը կրկին կանխվել է ՀՀ ԿԲ-ի իրականացրած արտարժութային ինտերվենցիայի շնորհիվ: Անցած շաբաթ ԿԲ-ն ավելի քան 21 մհլիոն կանխիկ դոլար էր լցրել շուկա՝ դրամի փլուզում թույլ չտալու համար»:
