Կիևյան փողոցում բախվել են 4 ավտոմեքենաներ. երկվորյակ քույրերը տեղափոխվել են հիվանդանոց
Ոստիկանության քննչական գլխավոր վարչության Երևանի քննչական վարչության ճանապարահատրանսպորտային հանցագործությունների քննության բաժնի ավագ քննիչ Աշոտ Ասատուրյանի կողմից նյութեր են նախապատրաստվում երեկ՝ մարտի 8-ին, Երևանի Կիևյան 6 շենքի դիմաց տեղի ունեցած ավտովթարի փաստով։
Ինչպես հայտնում է ֆոտոլրագրող Գագիկ Շամշյանը, ժամը 22։00-ի սահմաններում բախվել են Երևան քաղաքի Ֆուչիկի փողոցի բնակիչ, 22-ամյա Արթուր Քոչարյանի վարած «Միցուբիշի» մակնիշի 16 ՍՏ 200, Երևան քաղաքի Վահագնի թաղամասի բնակիչ, 27-ամյա Զոհրաբ Քերոբյանի վարած «Տոյոտա» մակնիշի 88 ԼԼ 550, Իջևան քաղաքի բնակիչ, 58-ամյա Միքայել Բլբուլյանի վարած «Սայպա» մակնիշի Լ 3459 և Երևան քաղաքի Անդրանիկի փողոցի բնակիչ, 37-ամյա Հերմինե Պողսյանի վարած «Մերսեդես Բենց» մակնիշի 08 ՕՍ 222 համարանիշների ավտոմեքենաները։
Ֆոտոլրագրողը հայտնում է, որ վթարի հետևանքով «Միցուբիշ»-ի ուղևորներ, Երևան քաղաքի Աղբյուր Սերոբի փողոցի բնակիչներ, 21-ամյա Մելինե և Մարիամ Հյուսյանները մարմնական վնասվածքներով տեղափոխվել են «Արմենիա» բժշկական կենտրոն, որտեղ ստացել են ամբուլատոր բուժօգնություն։
Ըստ ֆոտոլրագրողի՝ վիրավորները երկվորյակ քույրեր են։
