Ռուբեն Հակոբյանը՝ մանդատի ու ասֆալտ փռելու մասին. մամուլ
«Առավոտ» օրաթերթը գրում է. «Երեկ Րաֆֆի Հովհաննիսյանի` Գյումրիում կայացած հանրահավաքի ժամանակ ելույթ ունեցավ «Ժառանգություն» խմբակցության ղեկավար Ռուբեն Հակոբյանը, ով իր խոսքը նվիրեց իր ՀՀԿ-ական գործընկերոջը` Սուքիաս Ավետիսյանին:
Հիշեցնենք, որ նախագահական ընտորւթյունների օրը Գյումրու ընտրատեղամասերից մեկում քաշքշուկ էր տեղի ունեցել այս երկու պատգամավորների միջև: Իսկ երեկ ՀՀԿ-ական պատգամավորը, ելույթ ունենալով Գյումրու ԳԱԼԱ հեռուստաընկերությամբ, կարծիք էր հայտնել, որ Րաֆֆին Գյումրիում հանրահավաք անցկացնելու փոխարեն լավ կաներ օգուտ տար Գյումրիին, այս քաղաքի փողոցները ասֆալտապատեր:
«Չեմ երկարացնի, բայց պետք է ասեմ, երեկ հեռուստակայաններից մեկում պատգամավորներից մեկը, ձեր պատգամավորներից մեկը ասաց , թե ինչո՞ւ է Րաֆֆին գալիս Գյումրի, երբևէ ասֆալտ թափե՞լ է գյումրեցու համար : Ասեմ ձեզ հետևյալը. ցավ է, որ նման մտավորական, ինտելեկտուալ քաղաքից կարող է պատգամավոր գար հասներ Ազգային ժողով, որը չգիտի, որ Ազգային ժողովում օրենք են գրում , ով գիտի մի բան, որ ունենա մանդատ և իր ասֆալտ փռելու գործերը հաջողի, կարողանա ինչ-որ բան ներկրել: Ձեզ պատիվ չի բերում, որ էդ տեսակը գալիս, ձեզ ներկայացնում է, «ո՛չ» պետք է ասել էդ տեսակին»,- ասաց Ռուբեն Հակոբյանը»:
