ԲՀԿ-ՀՅԴ մրցակցություն՝ Վերին Բազմաբերդի գյուղապետի պաշտոնի համար
Մարտի 24-ին Արագածոտնի մարզի Վերին Բազմաբերդ համայնքում կանցկացվեն գյուղապետի արտահերթ ընտրություններ: Համայնքն ունի շուրջ 340 ընտրող:
Ընտրություններին գրանցված են համայնքապետի երկու թեկնածուներ` «Բարգավաճ Հայաստան» կուսակցության կողմից առաջադրված ԲՀԿ անդամ Զաքար Զաքարյանը և ինքաառաջադրված, ՀՅԴ անդամ, Արագածոտնի տարածաշրջանային պետական քոլեջի արտադրական ուսուցման վարպետ Արտաշես Սաֆարյանը:
Ընտրությունների նախապատրաստման և անցկացման հիմնական միջոցառումների ժամանակացույցի համաձայն` նախընտրական քարոզչությունը կմեկնարկի մարտի 12-ին և կավարտի մարտի 22-ին: Թեկնածուներն ինքնաբացարկի իրավունքից կարող են օգտվել մինչև մարտի 14-ի ժամը 18-ը:
Նշենք, որ Վերին Բազմաբերդի նախկին գյուղապետ Հունան Առաքելյանի լիազորությունները վաղաժամկետ դադարեցվել են ՀՀ կառավարության հունվարի 31-ի որոշմամբ` հիմք ընդունելով առողջական վիճակի վատթարացման հիմնավորմամբ նրա հրաժարականը:
Համայնքի ղեկավարի արտահերթ ընտրության նախապատրաստման ու անցկացման ծախսերը ֆինանսավորելու նպատակով ՀՀ 2013 թ.-ի պետական բյուջեով նախատեսված` ՀՀ կառավարության պահուստային ֆոնդի հաշվին որոշվել է Կենտրոնական ընտրական հանձնաժողովին հատկացնել 614 հազար 835,6 դրամ, իսկ ՀՀ ոստիկանությանը` 1 հազար 314,3 դրամ։
