Սիրիական ընդդիմությունը հրաժարվել է բանակցելու նպատակով մեկնել Մոսկվա և Վաշինգտոն
BBC-ի փոխանցմամբ` Սիրիայի ընդդիմադիր ու հեղափոխական ուժերի ազգային դաշինքը մերժել է Մոսկվա և Վաշինգտոն այվելելու հրավերը` սիրիական ճգնաժամի խաղաղ կարգավորման վերաբերյալ բանակցություններ վարելու համար: Նշվում է, որ ընդդիմադիրները հրաժարվել են նաև մասնակցել մարտին Հռոմում կայանալիք «Սիրիայի բարեկամների» խմբի հանդիպմանը:
Սիրիական ընդդիմությունն իր այս որոշումը պատճառաբանել է նրանով, որ Սիրիայի նախագահ Բաշար Ասադի զորքերը հրթիռակոծել են Հալեպ քաղաքի արևելյան երկու թաղամասերը, ինչի հետևանքով` նրանց պնդմամբ, իբրև թե, զոհվել են հարյուրավոր խաղաղ բնակիչներ: Սիրիական ընդդիմությունը տեղի ունեցածի մեջ մեղադրել է նաև Ռուսաստանին, որը նրանց խոսքերով շարունակում է զենք մատակարարել Ասադի վարչակարգին:
Միևնույն ժամանակ Սիրիայի հարցով ՄԱԿ-ի ու ԱՊԼ-ի հատուկ ներկայացուցիչ Լախդար Բրահիմին անդրադարձել է Դամասկոսում երեկ գրանցված մի շարք պայթյուններին, որոնց հետևանքով զոհվել է 100 մարդ (արյունոտ հինգշաբթի).
«Ես կտրականապես դատապարտում եմ երեկ Դամասկոսում տեղի ունեցած այդ վայրենի ու սարսափելի պայթյունները, որոնց հետևանքով սպանվել է մոտ 100 մարդ և վիրավորվել է 250 խաղաղ բնակիչ: Միջազգային իրավունքի համաձայն այդպիսի գործողությունները հանդիսանում են ռազմական հանցանք»:
