Լեռնային Ղարաբաղում խաղաղապահ ուժերի տեղակայումն արդյունավետ չէ. Ադրբեջանում Իրանի դեսպան
Իրանական IRNA լրատվական գործակալությանը տված հարցազրույցի ժամանակ Ադրբեջանում Իրանի դեսպան Մոհսեն Պակ Այինն անդրադարձել է Լեռնային Ղարաբաղում խաղաղապահների տեղակայման խնդրին.
«Լեռնային Ղարաբաղում խաղաղապահ ուժերի տեղակայումը ոչ միայն արդյունավետ քայլ չէ, այլև՝ այդ քայլը նոր խնդիրներ կստեղծի տարածաշրջանի անվտանգության համար: Տարածաշրջանի երկրները կարող են առաջարկել հակամարտության կարգավորման ավելի տրամաբանական ուղիներ:
Տարածաշրջանից հեռու ընկած երկրները և կառույցները հետևողական չեն հակամարտության կարգավորման հարցում: Ներկայումս Լեռնային Ղարաբաղում խաղաղապահ ուժերի տեղակայման հավանականությունը փոքր է: Դրա համար անհրաժեշտ են լուրջ հիմքեր, սակայն դրանք դեռ չեն նախապատրաստվել»:
Հիշեցնենք, որ կարծիքներ կան, թե Ռուսաստանը ներկայումս կարող է օգտագործել Ստեփանակերտի օդանավակայանի բացման շուրջ ստեղծված իրավիճակը և այդ պատրվակով իր խաղաղապահներին տեղակայել ԼՂՀ-ում:
Ի դեպ, ռուս քաղաքագետ, Սևծովյան-կասպյան տարածաշրջանի քաղաքական ու սոցիալական հետազոտությունների հասարակական ինստիտուտի տնօրեն Վլադիմիր Զախարովը ոչ վաղ անցյալում հայտարարեց, թե ԱՄՆ-ն արդեն երկու անգամ դիմել է ՄԱԿ-ին՝ Լեռնային Ղարաբաղի տարածքում իր խաղաղապահ կոնտինգենտին մտցնելու հարցում թույլտվություն ստանալու համար:
