Փարիզի կենտրոնում գտնվող ոսկեղենի խանութից առևանգել են 3 միլիոն եվրո արժողությամբ ոսկյա զարդեր
France-Presse լրատվական գործակալության փոխանցմամբ՝ զինված հանցագործները երեկ թալանել են Փարիզում գտնվող ոսկեղենի խանութներից մեկը: Ոստիկանության տվյալներով՝ երեկ առավոտյան ատրճանակներով զինված երկու տղամարդ մուտք են գործել Փարիզի կենտրոնում գտնվող De Beers ընկերությանը պատկանող խանութ:
Հավաքելով երկու ցուցասեղանի թանկարժեք զարդերը՝ հանցագործները խանութը լքել են նրա գաղտնի ելքով: Խանութի թալանման ժամանակ նրանք չեն կրակել և միջադեպի հետևանքով ոչ ոք չի տուժել: Իրավապահների տվյալներով՝ ընդհանուր առմամբ գողոնը գնահատվում է 3 միլիոն եվրո:
Նշվում է, որ De Beers ընկերությունը հանդիսանում է ալմաստի ու ադամանդի արտադրության ու վաճառքի համաշխարհային առաջնորդներից մեկը: Աֆրիկայում գտնվող այդ ընկերության հանքերում արտադրվում է աշխարհում արդյունահանվող ալմաստի մոտ 40 տոկոսը:
