Lamborghini-ն պատրաստվում է Ferrari-ի դեմ հերթական ճակատամարտին

Lamborghini-ի և Ferrari-ի հավերժ հակամարտության հերթական դրսևորմանը հնարավոր կլինի ականատես լինել Ժնևի առաջիկ ավտոսալոնում։ Lamborghini-ն պատրաստվում է իր նոր սուպերմեքենայով ետին պլան մղել Ferrari F12-ին։

Առավելևս, որ Lamborghini-ն այս տարի նշում է իր 50-ամյա հոբելյանը։ Այնպես որ, պարտվելը բացառվում է։

Ընկերության ղեկավար Ստեֆան Վինկելմանը խոստացել է Ժնևում ցուցադրել «իրոք արտասովոր ինչ-որ բան՝ V12 շարժիչով»։ Մեքենայի տեխնիկական բնութագիրչները գաղտնի են պահվում։ Այդուհանդերձ, Autocar-ի տվյալներով, նոր մեքենան կունենա 740 ձիաուժ հզորություն, իսկ թափքն ամբողջությամբ պատրաստված կլինի կարբոնից։

Չնայած այս սպառնալիքներին, մասնագետները նշում են, որ Ferrari-ն մտահոգվելու լուրջ պատճառներ չունի։ Բանն այն է, որ Lamborghini-ի գլխավոր խնդիրն այս պահին Urus կրոսսովերի սերիական արտադրությունն է։ Այնպես որ, նոր մեքենան նվազագույնը մեկ տարի կմնա որպես կոնցեպտ։